ខាងក្រោមនេះគឺជាវិធីណែនាំតាមក្បួនហុងស៊ុយដែលអាចធានាបានថា ប្រសិនបើអ្នក ប្រតិបត្តិបានខ្ជាប់ខ្ជួននោះមនុស្សជាទីស្រឡាញ់របស់អ្នកប្រាកដជាមិនចង់ឃ្លាតឆ្ងាយមួយជំហានណាឡើយ ។
- នៅក្រោមគ្រែដំណេកមិនគួរយករបស់របរដែលលែងត្រូវការប្រើប្រាស់ទៅញាត់ទុកនៅទីនោះជាដាច់ខាត ជាពិសេសរបស់របរបាក់បែកគួរចៀសឱ្យបាន ។ ក៏ប៉ុន្តែប្រសិនបើស្ថិតក្នុងករណីចាំបាច់ព្រោះគ្មានកន្លែងទំនេរទុកដាក់ទេនោះសូមណែនាំឱ្យរក្សាទុកតែរបស់របរថ្មីៗសំខាន់ៗ ដោយរៀបចំទុកដាក់ឱ្យមានរបៀបរៀបរយបំផុត ។ ប្រសិនបើនៅក្រោមគ្រែដេកមានសភាពស្តុកពេក ឬរក្សានូវរបស់បាក់បែកវានឹងធ្វើឱ្យគូស្នេហ៍មានសុខភាពមិនរឹងមាំ ហើយថែមទាំងឧស្សាហ៍ឈ្លោះប្រកែកពាក់មុខយក្សដាក់គ្នាទៀតផង ។
- នៅត្រង់មាត់បង្អួចក្នុងបន្ទប់ដំណេករបស់គូស្នេហ៍គួរប្រើវាំងននក្រណាត់ច្រើនជាងវាំងននជារបាំងប្លាស្ទីក ដែលមើលទៅឃើញរឹងហួសហេតុពេកមិនរសាត់ប៉ើងទៅតាមខ្យល់ដូចជាវាំងននក្រណាត់ ។ ហេតុផលក៏ព្រោះបន្ទប់ដេកត្រូវការអ្វីៗដែលទន់ភ្លន់រលូនមិនត្រូវការអ្វីដែលរឹងនោះទេ ទោះបីមានសោភ័ណភាពគាប់ភ្នែកក៏ដោយចុះ ។ គេមានជំនឿថា ការប្រើវាំងននក្រណាត់ជួយបិទបាំង នឹងជួយផ្តល់សំណាងល្អដល់គូស្នេហ៍ក្នុងរឿងសុភមង្គល ។ ប្រសិនបើបន្ទប់គេងរបស់អ្នកមានបិទបាំងដោយកញ្ចក់ដែលអាចមើលឃើញទេសភាពនៅខាងក្រៅបានច្បាស់ ហាមរំកិលគ្រែដេកចូលទៅកៀកនឹងមាត់បង្អួចនោះពេក ឬក៏ហាមដាក់ក្បែរ ទោះបីក្នុងចិត្តនាងមានបំណងចង់គយគន់ទេសភាពនោះក៏ដោយចុះ ។ ថាមពលដែលជះចូលពីក្រៅមកតាមបង្អួចទោះបីមិនបង្កផលប៉ះពាល់ដល់គូស្នេហ៍ ឬជួបរឿងរកាំរកូសគ្នាក្តី ប៉ុន្តែវាក៏អាចធ្វើឱ្យដេកមិនលក់ស្កប់ស្កល់ដែរជាពិសេសមានសុបិនអាក្រក់ៗទៀតផង ។
- ពេលមានឱកាសបានទៅដើរផ្សារគួរកុំភ្លេចរកទិញថូផ្កាមួយមករក្សាទុកនៅក្នុងបន្ទប់គេង ឬជាផើងផ្កាក៏អាចប្រើការបានដូចគ្នា ។ ក៏ប៉ុន្តែគួរជ្រើសរើសផើងពណ៌ស រីឯផ្កាវិញគួរមានពណ៌ក្រហម ឬស៊ីជម្ពូ ដើម្បីជួយពង្រឹងថាមពលស្នេហារបស់អ្នកទាំងពីរឱ្យមានភាពរឹងមាំ ។
- ហាមដាក់ក្បាលដំណេកទៅរកបន្ទប់ទឹកជាដាច់ខាត ព្រោះអាចធ្វើឱ្យថាមពលស្នេហ៍ ដែលកំពុងតែរះចិញ្ចាចចិញ្ចែង អាប់ឱនរស្មីបានយ៉ាងងាយ ។ នេះជាហេតុផលដែលធ្វើឱ្យគូស្នេហ៍ជួបតែរឿងប្រេះឆា បែកបាក់រវាងគ្នានឹងគ្នាមិនឈប់ឈរ ។
- មិនគួររៀបចំគ្រែដេកដែលមានចុងជើងបែរទៅរកមាត់ទ្វារនោះទេ ព្រោះវាអាចនាំឱ្យអពមង្គលក្នុងជីវិតគូស្នេហ៍យ៉ាងក្រៃលែង ។ ប្រសិនបើចុងជើងបែរទៅចំមាត់ទ្វារនោះវានឹងធ្វើឱ្យកើតមានជម្លោះគ្នានៅក្នុងសង្គមគ្រួសារសុខភាពចុះខ្សោយ ព្រមទាំងកើតជំងឺញឹកញាប់ទៀតផង ។ សរុបរួមភាពកក់ក្តៅ និងសេចក្តីសុខរបស់អ្នកទាំងពីរកាន់តែចុះខ្សោយទៅៗជាលំដាប់ទៀតផង ។
- បញ្ហាផ្ទៃកម្រាលបន្ទប់ដេកក៏មានទំនាក់ទំនងគ្នាជាមួយនឹងជីវិតរស់នៅផងដែរ ។ ផ្ទៃកម្រាលបន្ទប់គួរមានលក្ខណៈរាបស្មើមានក្បួរក្បាច់គួរឱ្យចង់គយគន់។ ក៏ប៉ុន្តែប្រសិនបើមានពណ៌លាតកាន់តែប្រសើរ ប៉ុន្តែហាមជ្រើសរើសយកព្រំបែបក្រឡាក្បាច់ខ្វាត់ខ្វែងគួរឱ្យចង់វិលមុខ ព្រោះមិនអាចធ្វើឱ្យស្នេហារបស់អ្នកជួបនឹងភាពស្រណុកស្រួលដូចបំណងឡើយ ។
- ហាមប្រើភួយពណ៌សនៅក្នុងបន្ទប់ដេក ព្រោះភួយពណ៌សនេះ ប្រសិនបើយកមកប្រើដណ្តប់រាងកាយប្រៀបដូចជាសញ្ញានៃមនុស្សស្លាប់ ។
- កម្រាលពូកពណ៌ស ទោះបីមើលឃើញថា វាស្អាតនិងមានអនាម័យក្តីតែមិនស័ក្តិសមនឹងយកមកប្រើនៅទីដំណេកនោះឡើយ ព្រោះពណ៌សនេះវាធ្វើឱ្យថាមពលនៃក្តីស្រឡាញ់របស់អ្នកបែកខ្ចាត់ខ្ចាយគួរជ្រើសរើសយកពណ៌ដទៃពីនេះទើបប្រសើរ៕
